កីឡា៖ ក្រុមបាល់ទាត់បុរសអាយុក្រោម ២៣ឆ្នាំអ៊ូសបេគីស្ថាន និងជប៉ុនបានកក់កៅអីបង្ហាញខ្លួននៅព្រឹត្តិការណ៍កីឡាអូឡាំពិកជាផ្លូវការ ក្រោយពីដឹកដៃគ្នាឡើងទៅកាន់វគ្គផ្តាច់ព្រ័ត្រ AFC U-23 Asian Cup បន្ទាប់ពីទម្លាក់ក្រុមអ៊ីរ៉ាក់ និងឥណ្ឌូណេស៊ីកាលពីយប់មិញនេះ នៅលើទឹកដីកាតា។ សូមបញ្ជាក់ថា អ៊ូសបេគីស្ថាន បានទម្លាក់ឥណ្ឌូណេស៊ីក្នុងលទ្ធផល ២-០ លើក្រុមឥណ្ឌូណេស៊ី ដើម្បីធានាកៅអីសម្រាប់ការបង្ហាញខ្លួនលើកដំបូងបង្អស់របស់ខ្លួននៅក្នុងព្រឹត្តិការណ៍កីឡាអូឡាំពិក រាប់ចាប់តាំងពីឆ្នាំ១៩៩១ ដែលខ្លួនបានទទួលឯករាជ្យពីសហភាពសូវៀត។ 

គួរបញ្ជាក់ថា អ៊ូសបេគីស្ថាននឹងត្រូវជួបជាមួយជប៉ុននាវគ្គផ្តាច់ព្រ័ត្រនៅកីឡដ្ឋាន Jassim bin Hamad នាទីក្រុងដូហា ខណៈដែលជប៉ុនបានកក់កៅអីបង្ហាញខ្លួននៅព្រឹត្តិការណ៍កីឡាអូឡាំពិករួចរាល់ ក្រោយពីទម្លាក់អ៊ីរ៉ាក់ក្នុងលទ្ធផល ២-០ ដូចគ្នា។ គួរបញ្ជាក់ថា ការទម្លាក់អ៊ីរ៉ាក់និងឡើងមកកាន់វគ្គផ្តាច់ព្រ័ត្រនេះមានន័យថា ជប៉៉ុនទទួលបានឱកាសបង្ហាញខ្លួនជាប់ៗគ្នានៅក្នុងព្រឹត្តិការណ៍កីឡាអូឡាំពិក រាប់ចាប់តាំងពីឆ្នាំ១៩៩៦ មក។ 

គួររំលឹកផងដែរថា  ក្រុមបាល់ទាត់បុរសអាយុក្រោម ២៣ឆ្នាំអ៊ូសបេគីស្ថានគឺជាម្ចាស់ជើងឯកពានរង្វាន់ AFC Asian Cup U23 កាលពីឆ្នាំ២០១៨ ខណៈជប៉ុនគឺជាម្ចាស់ជើងឯកកាលពីឆ្នាំ២០១៦ ដោយក្រុមទាំងពីរនឹងត្រូវជួបគ្នារកក្រុមម្ចាស់ជើងឯកឆ្នាំ២០២៤ នាថ្ងៃសុក្រចុងសប្តាហ៍នេះ។ 

ដោយឡែក អ៊ីរ៉ាក់ និងឥណ្ឌូណេស៊ី ដែលធ្លាក់ចេញត្រឹមវគ្គពាក់កណ្ដាលផ្តាច់ព្រ័ត្រនឹងជួបគ្នាដណ្តើមចំណាត់ថ្នាក់លេខ៣ នាថ្ងៃព្រហស្បតិ៍ ដោយក្រុមចំណាត់ថ្នាក់លេខ៣ នឹងទទួលបានកៅអីមួយទៀតដោយស្វ័យប្រវត្តិសម្រាប់បង្ហាញខ្លួននៅក្នុងព្រឹត្តិការណ៍កីឡាអូឡាំពិក ទីក្រុងប៉ារីស ឆ្នាំ២០២៤។ ចំពោះក្រុមចំណាត់ថ្នាក់លេខ៤ នឹងត្រូវប្រកួតជម្រុះដណ្តើម ១ កៅអីទល់នឹងប្រទេសហ្គីណេមកពីទ្វីបអាហ្វ្រិក៕